BİR ÇOXU QƏLƏM GÖTÜRÜB

BİR ÇOXU QƏLƏM GÖTÜRÜB

Bir çoxu qələm götürüb,
Yazır boşuna-boşuna.
Qələm də gəzir adamdan
Daha yaşına-yaşına.

Mənəvi dünya puç olur,
Pak dünənimiz heç olur,
Sonunda bunlar suç olur,
Candan daşına-daşına.

Dün içimizdən doğulan,
Canı boğaza yığılan,
Gedib yad elə dağılan
Döyər başına-başına.

Çox kök-soyuna xor baxan,
Durub aləmə zor baxan,
Şəri içinə buraxan,
Dönər qışına-qışına.

Budur millətə qərəzi,
Səhv ölçüb-biçər tərəzi,
Kökə çirkabdı mərəzi,
Qalar qaşına-qaşına.

Şadiman, öldür həvəsi,
Yada eşq kəsər nəfəsi,
Udar tarixin səhnəsi…
Gedər aşına-aşına.
27.12.2014
Şirin Xanım Kərimbəyli Şadiman