GÜLÜŞLƏR QONUB DODAĞA

GÜLÜŞLƏR QONUB
DODAĞA

Gülüşlər qonub dodağa,
Bir incə mətləb istəyir,
Vurur özün daşa, dağa,
Ürəyimdən təb istəyir.

Çeşmə-çeşmə sular təki,
Zirvələri çalar təki,
Gəlib qəlbi alar təki,
Yara vurub həb istəyir.

Heyrətinə bürünmüşəm,
Arxasınca sürünmüşəm,
Hara baxsa görünmüşəm,
Hər eyhamda dəb istəyir.

Gülüşlərin əvəzi yox,
Çəkəcəyim tərəzi yox,
Mənimlə bir qərəzi yox,
Qəmimdən ədəb istəyir.
12.02.2013