2012-ci ildə çapdan çıxan ”Ay adamlar mən burdayam” kitabımdan sonra beş ildi ki, illərin acı-ağrısını, sevincini hopdurub misralarıma bənd-bənd şeirlərə, mənzum hekayələrə köçürtdüm. Əslində şeir nədir? Şeir yaşadığımız həyatın həqiqiliyinin güzgüsüdür. Yazdıqlarımı ilhamın diqtəsi ilə gördüklərimi və könül süzgəcindən keçirtdiklərimi şeirin müxtəlif növlər üzrə bəndlərinə yerləşdirdim. Burada tarixlə bağlılıqlar, təbiət, ilham, adamın özü ilə baş-başa, göz-gözə daxili dialoqları önəmli yer tutur. Kitabda insanın iç dünyası ilə gerçək dünya arasında baş verən toqquşmalar, üsyanlar, kədər, fərəh anları, bir sözlə həyat həqiqətləri öz əksini tapıb. Bir müəllif olaraq mənə elə gəlir ki, istər yazıçı, istər şair oxucunu yazdıqlarının sehrinə sala bilmirsə, onda təəccüb, həyəcan, fərəh doğurmursa, o zaman, o, öz istəklərini oxucuya çatdıra bilmir, oxucunu yaşadığımız dünyanın ovqatına kökləyə bilmir. Beləliklə, hər bir insan kimi şair də bir ömür yaşayır. Yaşadağı ömür dolaylarında ətrafda baş verənləri doğru-düzgün, heç kimə yarınmadan, heç kimi öymədən misralarına hopdurmaq, şair olanın qələmə və Yaradana olan sadiqlik vəzifəsidir. Mən də çalışmışam ki, bundan öncəki, çapdan çıxan kitablarımda olduğu kimi təmizliyi, düzlüyü, sadiqliyi qoruyum. “ Tək Yaradana gümanım” kitabımda qoşmalar, bayatılar, ikiliklər, dördlüklər, deyimlər, qəzəllər, nəzm-hekayələr, bir də kitabın son fəslində son aylarda yazdığım publisistik məqalələr yer alıb. Bir sözlə özümün yaşadıqlarımı, ətrafda baş verənlər, dünyamızın ağrılı həyat hekayələri yağış təki ürəyimə yağıb və qələmim vasitəsi ilə damla-damla, zərrə-zərrə misralara süzülüb. Arı hər çiçəkdən şirə çəkən kimi, mən də hər üzdən, hər gözdən, min bir məna buldum, könlüm dilə gəldi, məni əzablara, sevinclərə tuş edən ilhamımla qoşalaşdı, sözlərdən misra-misra çələng hördü. Kitabın, mənəviyyatın arxa plana keçdiyi bir zamanda dəyərli oxucuları təkcə mənim yox, gözünün nurunu yazdıqlarına ərmağan edən digər müəlliflərin kitablarını oxumağa dəvət edirəm. Mütaliyə biliyin anasıdır deyirlər, oxuyun nitqiniz bələğətli olsun, mənəvi dünyanız zənginləşsin. Yeni çapdan çıxan “Tək Yaradana gümanım” kitabımı sizlərə əmanət edirəm. Daima kitablarla ünsiyyətdə olasınız, mənəviyyatı zəngin millətlər həmişə öndədir, Öndə olanlardan olaq, Vətən övladları!…
27.12. 2016 Müəllif