Hər tərəf düşməndi, hər tərəf yağı,
Artır gündən-günə yurdun növrağı,
Qarabağ yağıya bir sinə dağı,
Salma nəzərindən sədaqətimi,
İlahi, sən qoru məmləkətimi.
Yala həvəslilər artır günbəgün,
Dilləri zəhərdir, qəlbləri gərgin,
Ağıldan zaylarda düşüncə ölgün,
Əskiltmə ruhumdan ədalətimi,
İlahi, sən qoru məmləkətimi.
Süpür yurd-yuvamdan taxtabaşları,
Düşsün başlarına hiylə daşları,
Vətən sevdalı et vətəndaşları,
Şəhidimə artır ibadətimi,
İlahi, sən qoru məmləkətimi.
Dünyanın içində fitnə daşmada,
Çoxu yol-irızın hər gün çaşmada,
Aləm bir-birinə çox qarışmada,
Aç həqiqətimə bəsirətimi,
İlahi, sən qoru məmləkətimi.
Biz çox ağrıları diləyə çəkdik,
Kök-soy eşqimizi ürəyə çəkdik,
Vətən fərydanı fələyə çəkdik,
Artır yurd sevdama itaətimi,
İlahi, sən qoru məmləkətimi.
Dəyməsin ölkəyə şərin ayağı,
Gəlsin zirvələrdən elin sorağı,
Sönməsin heç zaman odu, çırağı,
Qopartma sinədən məhəbbətimi,
İlahi, sən qoru məmləkətimi.
Doğulduğum yurddur mehman yerimiz,
Soyuma, kökümə səhman yerimiz,
Şəhid məzarına iman yerimiz,
Dəyişmə yadlara təbiətimi,
İlahi, sən qoru məmləkətimi.
Şadiman, sirr dolu bu aləm mənə,
Baxmasın hər yetən bəxti kəm mənə,
Kədər saxlancıdır gözü nəm mənə,
Yox et baş-binadan cəhalətimi,
İlahi, sən qoru məmləkətimi.
İlahi, sən qoru məmləkətimi.
11.09.2024