Mar
29
Sən ki, ruhumuza bağlısan, Vətən,
Dolaşıq kəndirlə bağlısan, Vətən.
Susub dinməyirsən işğal halına,
Bəlkə eşidələr ağlasan, Vətən…
***
Gecə ayı görüb küncə çəkilir,
Sübhün gəlməsiylə bağrı sökülür.
Hamı yuxusuna şəkər qatsa da,
Zülmətin gözündən yuxu tökülür…
***
Nə etdin çıxacaq bir gün qarşına,
Asılır sırğatək günlər yaşına.
Düzlükdən yapışıb düzə səcdə et,
Bulama ömrünü öz göz yaşına…
***
Adam bir ömürü yaşayıb gedir,
Adamlıq adını daşıyıb gedir.
Vay o gündən ki, insanlığını
Haqqın lövhəsindən qaşıyıb gedir…
***
Gəlib gedənlərin qəsiri dünya,
İnsan əməlinin əsiri dünya.
Adam sirlərilə dolu qəfəsin,
Açıb ağartmırsan çox siri dünya…
29.03.2019