باش صحیفه
  بدیی یارادیجی‌لیق
  بیبلیوقرافیا
  کیتاب‌لار
  مقاله‌لر
  شئیرلر
  پوئما‌لار
  درام‌لار
  پوبلیسیستیکا
  حاقیم‌داکی کیتاب‌لار
  شکیل‌لر
  قوناق دفتری
 علاقه
   
 

باغلانتی‌لار

 
 
   

تاغاییم

 

I حیسه

سلام اولسون شؤوکتوزه، ائلوزه
شهریار

سنده قالیب اوشاقلیغین ایللری،
اندیرمه‌نین ایلان ملر چؤل‌لری،
یاشیدلارین شیرین-شکر دیل‌لری،
قیزلار گلسین بولاغینا، تاغاییم،
سسیم یئتسین قولاغینا، تاغاییم.
سن آچیلان صاباحیمین اؤزوسن،
منیم اوچون بو دونیانین اوزوسن،
دوداغیمین چیچک دیل‌لی سؤزوسن،
چیچک‌لردن تول توخویان، تاغاییم،
گئجه-گوندوز گول قوخویان، تاغاییم.
آنام خزر تئل‌لرینی هؤرنده،
سحر شئهین باغ-باغچایا سرنده،
اوزومون‌دن، انجیرین‌دن درنده،
داد قالاردی دیلیمیزده، تاغاییم،
شیرلنمیش الیمیزده، تاغاییم.
گیلاوارین آرخاسینجا اوچاردیق،
چای آشاغی دلی کیمی قاچاردیق،
قایا‌لارا قایا‌دان یول آچاردیق،
گؤی خزردن گون قالخاردی، تاغاییم،
گیلگیلچایی لال آخاردی، تاغاییم.

آسماکؤرپو چای اوستونده دوراردی،
قیزمار گونش باشیمیزا ووراردی،
کؤرپه قیزلار گلین-ائوجیک قوراردی،
کؤرپو اوسته اوینایاردیق، تاغاییم،
قاریشقا تک قاینایاردیق، تاغاییم.
گون چیخاندا آدام‌لارین های-هویو،
اؤتورردی حیوان‌لاری گؤزبویو،
«کندیئری»نه اوت چیخاردی دیز بویو،
بیز ده قوزو اوتاراردیق، تاغاییم،
ایستی دوشدو یاتیراردیق، تاغاییم.
هره بیر گون چوبان‌لیغی داداندا،
آل سحرین گول هاواسین اوداندا،
قوش‌لار نغمه اوخویاردی هر یاندا،
گون دوغاردی جانیمیزدا، تاغاییم،
آلیشاردی قانیمیز دا، تاغاییم.
چیراققالا دومان‌لاردان چیخاندا،
مسعود، ملول بیزه طرف باخاندا،
اوزاق‌لاردا داغ‌دان شیمشک چاخاندا،
بیز ده قورخوب قاچیشاردیق، تاغاییم،
کپنکتک اوچوشاردیق، تاغاییم.
بیلمز ایدیک خسته‌لیک نه، مرز نه؟
داوا-دالاش، اومو-کوسو، غرض نه؟
دورمجلردیک شور-لاواشی چرز نه؟
گؤز اولاردی ائل نظری، تاغاییم،
او ایللرین یوخ بنزری، تاغاییم.
بیر زامان‌لار سئل‌لر داغ‌دان گلردی،
گیلگیلچایی کندی ایکی بؤلردی،
سویا دوشن قویون-قوزو ملردی،
سئل بیلمزدی باغچا-بوستان، تاغاییم،
اؤتن‌لرین اؤزو داستان، تاغاییم.
ائلین آغزی کندی بئله اؤیردی،
“یوخاریباش “، ”آشاغیباش” دئیردی،
نووروز اولدو، بیر-بیرینه دیردی،
گور تونقال‌لار آلیشاردی، تاغاییم،
اوشاق-بؤیوک یاریشاردی، تاغاییم.
اتیرلیدی کندین گؤزل یازلاری،
آلیاناق‌لی، اوجابوی‌لو قیزلاری،
یاندیراردی اوغلان‌لاری نازلاری،
جوشدوراردی دیلک‌لری، تاغاییم،
اوخشایاردی اورک‌لری، تاغاییم.
اوشاغلیغیم زامانیمین قوینوندا،
تالئییمیز فلک قویان قانوندا،
مات قالما‌لی رؤیا‌لارین اوینوندا،
رام ائدردی قورخولاری تاغاییم،
شیرین-شکر یوخولاری تاغاییم.
قیز-گلین‌لر بولاق اوسته گلردی،
دردی-سرین بیر-بیریله بؤلردی،
خیسین-خیسین پیچیلداشیب گولردی،
بئش آددیمدی بولاق بیزه، تاغاییم،
سس دولاردی ائویمیزه، تاغاییم.
آنام سحر ایشه-گوجه قاچاردی،
قاپیمیزی آنا ننم آچاردی،
”بالا” دئییب بیزی عشقله قوجاردی،
“ننه قوربان” کلمسیله، تاغاییم،
سئوینردیک گلمسیله، تاغاییم.
بی خانیمی سفوره‌نین اودون‌دان،
هئچ دویمادیم سؤزلری‌نین دادین‌دان،
اوغول داغ‌لی لوغمان-شاعر قادین‌دان،
بایاتی‌لار دینلمیشم، تاغاییم،
دینلدیکجه اینلمیشم، تاغاییم.
ایسلام عمی موغاماتی خوش‌لاردی،
تارین سسی ببک‌لرین یاش‌لاردی،
او یازدیغی شئیرلرله هوش‌لاردی،
نورا هسرت گؤزلریله، تاغاییم،
چوخ یانیق‌لی سؤزلریله، تاغاییم.
ایلک معلم، بیزه صابیر داییمیز،
درسی بیر گون بیلمسیدیک واییمیز،
دؤیولردیک قالماز ایدی هاییمیز،
درس‌دن ائوه دؤنمز ایدیک، تاغاییم،
نئجه حلیم، دینمز ایدیک، تاغاییم؟
ائوه گلدیم تاخچامیزا چیخاردیم،
تاپشیریلان درس‌لیک‌لره باخاردیم،
شئیر اولدو ائله برک‌دن اوخاردیم،
لاپ اورک‌دن آلیشاردیم، تاغاییم،
اؤز سسیمله یاریشاردیم، تاغاییم.
او منسوره آنامین جان کلمه‌سی،
تیکه‌سینی بیزیم ایله بؤلمه‌سی،
او گولساباه بیبیمین گنج اؤلمه‌سی،
اوندا گؤردوم فلک اوزون، تاغاییم،
قوهوم‌لارین یاش‌لی گؤزون تاغاییم.
هاجیبابا قارداشیمین زهیمی،
درس زامانی معلم‌لیک فهیمی،
اوشاق‌لارا هردن قفیل رحیمی-
کئچن‌لردن خوش خاطره، تاغاییم،
تاریخ اولوب هر سطره، تاغاییم.
آغابالا آتامین مرد ارلیگی،
آنامیزلا صاف مهببت بیرلیگی،
آتا‌لیغی، ائودارلیغی، دیرلیگی،
بیر اؤرنک‌دیر بو گون‌لره، تاغاییم،
بوگونکی توی-دوگون‌لره، تاغاییم.
نه دوشردی ترس فرهادین بئینینه؟
تزه پالتار گئیینمزدی اینینه،
پیس گلردی اونون اوشاق عینینه،
قوربان اولوم جفاسینا، تاغاییم،
قارداشیمین وفاسینا، تاغاییم.
خانیمه‌نین دوداغیندا گولوشو،
گول باجیمین او نازه‌نین یئریشی،
سئهیر ایدی باش‌دان-باشا هر ایشی،
چوخ آلمیسان قاداسینی، تاغاییم،
جان‌لار اوزن اداسینی، تاغاییم.
میرواری‌نین شیرین-شکر یئمه‌سی،
بیشمیش‌لری یئمه‌یه‌جم دئمه‌سی،
دور باجیمین هله اؤزون اؤیمه‌سی،
دیمز ایدی هئچ ختیره، تاغاییم،
اؤتن‌لردن بیر خاطره، تاغاییم.
هئیران ایدیم متانتین نازینا،
قارداشیمین یئددی گؤزل قیزینا،
من نه دئییم، فلک، هر کج یازینا؟-
قریب‌لییه دوشدو جانیم، تاغاییم،
سنله کئچدی ان خوش آنیم، تاغاییم.

گول آنامین هله ساخسی نئهره‌سی،
گلینیمیز مینانی آی چؤهره‌سی،
خانیمانا ننمین یون جهره‌سی-
هانا‌لاردا چیچک‌لردی، تاغاییم،
خالی‌لاردا گئرچک‌لردی، تاغاییم.
اوغلان‌لارین چیرتما ووروب اوخماسی،
اوشاق‌لارین دامباجا‌دان قورخماسی،
قیز-گلی‌نین چال-چپردن باخماسی،
دیل-دوداغدا نوغول‌لاشدی، تاغاییم،
خاطره‌لر ناغیل‌لاشدی، تاغاییم.
سبیره‌نین سؤزلری‌نین بال‌لیغی،
گلنیمیزین بؤیوک-کیچیک حال‌لیغی،
کند قیزینا خاس اوزونون آللیغی،
بیر سادت باغیش‌لاردی، تاغاییم،
نه مقدس باخیش‌لاردی، تاغاییم؟
نئچه-نئچه گلی‌نین دول قالماسی،
قاری‌لارین یاس‌لاردا ساچ یولماسی،
آغاجانین تک دام آلتدا اولماسی،
ایرانین فارس، قریب اوغلو، تاغاییم،
بختی کیمی یولو باغلی، تاغاییم.
توی‌دان قاباق قیزلارین جمع اولماسی،
\یونو دیدیب یورغان-دؤشک سالماسی،
کندیمیزین بولاماسی، دولماسی،
آغیزلاردا دادا دؤندو تاغاییم،
قوهوم‌لار دا یادا دؤندو، تاغاییم.
او جمعیله ننه اولان سومییه،
تانیش ایدی ساده‌لیکله هامییه،
پیشیک‌لری ائیله‌یه‌رک هامییه،
تن بؤلردی پایینی دا، تاغاییم،
چوخالداردی سایینی دا، تاغاییم.
کند مسجیدی آغزی باغلی اولان‌دان،
ایمانیمیز آوازیییب سولان‌دان،
جاوان‌لارین سرخوش اولوب قالاندان…
هئی بوشالدی تاباق‌لارین، تاغاییم،
نه یاخشییدی قاباق‌لارین، تاغاییم؟!..
شفیقه‌نین قفیل گلن اؤلومو،
ظالم فلک ائیله‌ینده زولومو،
گؤردوم آغلار مزار اوسته ائلیمی،
یازیق بیبیم شامتک سؤندو، تاغاییم،
گؤز یاشیمیز سئله دؤندو، تاغاییم.
خالام اوغلو گنج تئییوبون وفاتی،
جاوان ایکن ناکام اولان حیاتی،
بو فلیین قارا گلن ساعتی،
آلدی گول‌لو باجی‌سینی، تاغاییم،
وئردی بختین آجی‌سینی، تاغاییم.
اون دؤرد یاش‌لی جانیم خسته دوشنده،
اورییمی یارا‌لیییب دئشنده،
ظالم اجل یاتاغیمی ائشنده،
ازراییلین اوزون گؤردوم، تاغاییم،
باشیم اوسته اؤزون گؤردوم، تاغاییم.
قاضی بابا کنددن کوسوب گئدنده،
تپه اوسته دام سالیب یورد ائدنده،
قوجا‌لیغی رهمت‌لیگی گودنده،
اوندا بیلدیم دونیا فانی، تاغاییم،
هر جان اوسته عؤمور آنی، تاغاییم.
قاری‌لارین یایما-لاواش یایاردی،
قوشالاییب سونرا جوت-جوت سایاردی،
کنده هره بیر آیاما قویاردی،
آغیزلارا یاراشاردی، تاغاییم،
دیل‌دن-دیله دولاشاردی، تاغاییم.
دلیقان‌لی جاوان‌لارین دل‌لیگی،
قوجا‌لارین چالما‌لاری، بئل‌لیگی،
تویدا، یاسدا آدام‌لارین ائللیگی،
ائوده-ائوه هیان ایدی، تاغاییم،
بیر-بیرینی سایان ایدی، تاغاییم.
سرینجیمیز سودله دولوب-داشاندا،
آلا اینک چؤل ائشقیله جوشاندا،
سود اوجاغدا قازان‌لاری آشاندا،
آنام بیزه سؤیلنردی، تاغاییم،
سونرا گولوب ایلنردی، تاغاییم.
بزننده توی‌خانا‌لار ال-الوان،
نوسو دایی اولاردی جلد، پهلوان،
گولشردی گولشچیتک چوخ روان،
زیللنردی زورنا سسی، تاغاییم،
زورناچی‌نین خوش نفه‌سی، تاغاییم.
گلین کؤچن قیزلارین ناز ساتاردی،
باش‌لارینا آل اؤرتوک‌لر آتاردی،
قاییناتا بئله کمر چاتاردی،
گلین اوزون گیزلدردی، تاغاییم،
بی ائوینی گؤزلدردی، تاغاییم…
نووروزگولو تورپاق آلت‌دان چیخاندا،
بولودلارین باهار گؤزون سیخاندا،
اوشاق ایکن من ده دولوب باخاندا،
آلیشاردیم یئل‌لر ایله، تاغاییم،
خوش، مقدس ایللر ایله، تاغاییم.
بایرام گلدی ائلین پیلوو آسماغی،
توربا آتیب قاپی‌لاری پوسماغی،
چرشنبه‌ده دام‌دان قولاق آسماغی،
سانجیلیب قان یادداشیما، تاغاییم،
دؤنوب اورک سیرداشیما، تاغاییم.
آمان الله، ائلیم، اوبام قانیمدا،
اوجاغیمین اودو هله جانیمدا،
کندین اؤزو رؤیا‌لاردا یانیمدا،
قوینونو آچ اؤولادینا، تاغاییم،
سال منی ده بیر یادینا، تاغاییم…

24-25.03.1998/ /نئفت داش‌لاری

ایکینجی حیسه
سالیرسانسا اگر منی یادینا،
یادداشینی ایله، گتیر دادینا،
باش اییرم من مقدس آدینا،
یانسین هر آن اوجاق‌لارین، تاغاییم،
گؤرمه‌یه‌سن قم داغ‌لارین، تاغاییم.
هیاجانلا قورخولارا گلمیشم،
شیرین، شکر یوخولارا گلمیشم،
اتیر ساچان قوخولارا گلمیشم،
ایلهامیما آچ یووانی، تاغاییم،
جیریمه سپ هاوانی، تاغاییم.
تب خالی‌سین چالارلارا توتموشام،
یادداشیمدا بویا‌لارین قاتمیشام،
خاتیراتی جان مولکونه چاتمیشام،
چیخمیشام سؤز پیشوازینا، تاغاییم،
قلمیمین دؤز نازینا، تاغاییم.
کئچمیشینی بیرر-بیرر ایزلرم،
زماننین یوخوش‌لارین دوزلرم،
آستارینا اوز توتارام، اوزلرم،
واخت آتی‌نین کؤنلون آللام، تاغاییم.
اؤتن‌لره نظر ساللام، تاغاییم،
بی آدیمیز تاریخ‌لره کؤچدولر،
گده-گوده قانیمیزی ایچدی‌لر،
واریمیزین چکی‌سینی اؤلچدولر،
سن بون‌لارا شاهید اولدون، تاغاییم،
هامی اوچون واهید اولدون، تاغاییم.
کریم بیین ایکی اوغلو وار ایدی،
هاجیاغا، آغابالا جار ایدی،
آد-سان‌لاری ائل-اوبایا یار ایدی،
بو شؤهرتی سن ده گؤردون، تاغاییم،
ثروتی‌نین بارین دردین، تاغاییم.
هاجی آغا بیلیگین بار-بهری،
یار-یولداشی قوبا خانین گؤوهری،
قوناق‌لیقدا ایچیرتدی‌لر زهری
اؤلدوردولر بی کیشینی، تاغاییم،
وای ائتدی‌لر گردیشینی، تاغاییم.
بی خانیمی قیزلارینی گؤتوردو،
اؤزلرینی قوبا خانا یئتیردی،
ایزلرینی دوشمن‌لری ایتیردی،
اؤزون گؤردون بو آغرینی، تاغاییم،
سن بیلیرسن لاپ دوغرونو، تاغاییم.
آغابالا اوغلو مممد بابامدی،
اوندان قالان بیزه پالچیق، گیل دامدی،
دونیا اؤزو آغی دولو بیر جامدی…
شیرینی آز، زهری چوخ، تاغاییم.
کیم دئیر کی، هئچ دردیم یوخ، تاغاییم؟!
آتا بابام بو دردلرله گؤیردی،
پیچیلتییلا بی آدینی اؤیردی،
دؤنه-دؤنه بایس‌لری سؤیردی،
کئچمیشیله چاغلایاردی، تاغاییم،
بختین حاقا باغلایاردی، تاغاییم.
من بابامین هئچ اوزونو گؤرمدیم،
نوه‌لره جان سؤزونو گؤرمدیم،
آدی قالدی، بیر اؤزونو گؤرمدیم،
زین‌دان‌لارا دوشدو جانی، تاغاییم،
عذاب‌لاردان دوندو قانی، تاغاییم.
یادداشی‌نین تاریخینی ایله‌دی،
آتام منه یانا-یانا سؤیله‌دی،
ظالم زامان بو آدلاری نئیله‌دی؟
چوخ سوسموسان بو سورغوما، تاغاییم،
اولان اولوب، سن آغریما، تاغاییم.
عزیزلریم بو دونیا‌دان کؤچدولر،
ازراییلین زهر سویون ایچدی‌لر،
ابه‌دی‌لیک او دونیانی سئچدی‌لر،
سن ده بونا دوروب باخدین، تاغاییم،
اورییمی یامان یاخدین، تاغاییم.
خیففت‌لردن باغیرلاری یاریلدی،
بی بابامین اوشاق‌لاری قیریلدی،
بدن‌لری مزارلارا ساریلدی،
بو دردلری سن ده بیلدین، تاغاییم،
گؤزلری‌نین یاشین سیلدین، تاغاییم.
کئچمیشینه گئدیب چیخان کؤکوم وار،
بو اؤلچوده داغ‌دان آغیر چکیم وار،
تاریخ کیمی ملهم ائدن هکیم وار،
بو هکیمین سؤزو درمان، تاغاییم،
گئج-تئز حاقا وئیریر فرمان، تاغاییم.
قوجا‌لارین اؤلوب گئتدی قالمادی،
هئچ بیری‌سی بو گون‌لره قالمادی،
هئچ اونلاردان دیلیم سوراق آلمادی،
کئچمیش‌لری بیرر-بیرر، تاغاییم،
اونوتقان‌لیق حاقی گرر، تاغاییم.
اون سککیزده وطن ظفر چالاندا،
ایستیقلا‌لی آل قانییلا آلاندا،
پاک، اوچ رنگ‌لی بایراغیمیز اولاندا،
بی‌لی، خان‌لی بایرام ائتدین، تاغاییم،
ایگیرموچ آی کاما یئتدین، تاغاییم.
سونرا گلدی، بولشئویکین هاواسی،
ائرمه‌نین موسلمانلا داواسی،
داغیدیلدی یوردوموزون یوواسی،
قانا دؤندو چؤل‌لریمیز، تاغاییم،
قارا گئیدی ائللریمیز، تاغاییم.
روس‌لار گلیب قانیمیزا سوساندا،
ائرمنی‌لر یوردوموزو باساندا.
داغدا، دوزده کولو-کوسو پوساندا،
یاغی قلبده یارا آچدی، تاغاییم،
آرواد، اوشاق کنددن قاچدی، تاغاییم.
ننم چاشیب کؤرپه‌سینی آتیبمیش،
اؤزون کنددن قاچان‌لارا قاتیبمیش،
مملکتین قارا بختی یاتیبمیش،
قاری بئله دانیشاردی، تاغاییم…
سونرا حالی قاریشاردی، تاغاییم.
خانیمانا ننم تورکو اؤیردی،
ائرمه‌نین آدی گلدی سؤیردی،
قاش‌لارینی دوگونله‌ییب ایردی،
بالاسینی هایلایاردی، تاغاییم،
یاغی‌لاری وایلایاردی، تاغاییم.
قوجا‌لارین کئچمیش‌لره واراردی،
کریم، قاسیم، سوجددین بی آراردی،
دئیردی‌لر، باشدا بی‌لر دوراردی،
بؤیوک، کیچیک بیلینردی، تاغاییم،
یاش‌لی گؤزلر سیلینردی، تاغاییم.
کریم بیین اوجاغی‌نین اودویام،
هاردا اولسام ائله اونون آدییام،
تورپاغی‌نین من ده آغیز دادییام،
اوجا‌لارام شرفینله، تاغاییم،
اؤج آلارام سلفینله، تاغاییم.
سونونجو بی – حسینا‌لی عمیمیز،
بی‌لیک گئتدی، سولدو تالئ زمیمیز،
گده‌لره قالدی بوسات گمیمیز،
ائو-ائشیگی تالادی‌لار، تاغاییم،
قازان‌لاری یالادی‌لار، تاغاییم.
سفورن ده بی ارینه آغلاردی،
خانیملیغین یادا سالیب چاغ‌لاردی،
هوسئیناغا اوریینی داغ‌لاردی،
یاس توتاردی بالاسینا، تاغاییم،
اوجاغی‌نین قالاسینا، تاغاییم.
حسینا‌لی کؤرپوسون‌دن کئچنده،
کئچیب کندین ائولرینی سئچنده،
یول اوزونو گول-چیچک‌دن بیچنده،
اوخشایاردین اوز-گؤزومو تاغاییم،
قلبه ملهم اود-کؤزومو تاغاییم.
سید جامال آغانین پاک مزاری،
نزیر ائتسن آپاراردی آزاری،
آزا‌لاردی سینه‌لرین آه-زاری،
قبیر ائوی نورلا دولسون، تاغاییم،
روحو یوردا ملهم اولسون، تاغاییم.
هر گولسوره بیبی کنده گلنده،
آناسییلا دردی-سری بؤلنده،
زئمفیراسی، جاوان قیزی اؤلنده،
درد بورودو اوریینی، تاغاییم،
ییخدی کؤنول دیریینی، تاغاییم.
او هاجیاغا عمیمین بی گؤرنوشو،
ائل ایچینده آغایانا یئریشی،
بو فلیین ظالمانه گردیشی،
ائتدی اونو اوغول داغ‌لی، تاغاییم،
هئچ قالماسین قاپی باغلی، تاغاییم.
او رهمت‌لیک عمیم منی آپارمیش،
کؤرپه‌لیکده خسته‌لیک‌دن قوپارمیش،
گلمسیدی تنی مزار تاپارمیش،
کسدیریبمیش یانیمی دا، تاغاییم،
خلاص ائتمیش جانمیمی دا، تاغاییم.
دئییرلر کی، محاربه باشلادی،
باشلایاندا هر قاپینی داشلادی،
آنا‌لارین گؤزون قانلا یاشلادی،
اؤلدو گئتدی جاوان‌لارین، تاغاییم،
بوش قالدی چوخ اونوان‌لارین، تاغاییم.
پاپاق‌لی‌لار ائولرین‌دن گئتدی‌لر،
قان-قادا‌لی جبهه‌لره یئتدی‌لر،
آرواد-اوشاق نئجه فقان ائتدی‌لر؟!
قاتی اولدو دومان‌لارین، تاغاییم،
قان‌لی گلدی زامان‌لارین، تاغاییم.
آتا بابام مممه‌دی ده توتدولار،
توتوب ائله زین‌دان‌لارا آتدی‌لار،
بی آدینی خاین‌لره قاتدی‌لار،
خسته گلدی، ائوده اؤلدو، تاغاییم،
ازراییل دا اوزه گولدو، تاغاییم.
قاری، قوجا هئی هیتلئری سؤیوردو،
قارا خبر هر قاپینی دؤیوردو،
ظالم اؤلوم بوی-بوخونون اؤیوردو،
چوخ اوگوتدو مردلرینی، تاغاییم،
چوخ آرتیدیردی دردلرینی، تاغاییم.
او واخت روسون تورپاغییچین اؤلدولر،
تیکه‌لرین اونلارلا تن بؤلدولر،
ائولرینه یوزدن بیری گلدی‌لر،
سیتالینچین باش وئردی‌لر، تاغاییم،
گؤزلرین‌دن یاش وئردی‌لر، تاغاییم.
آنام دئییر، آجلیق کسدی آمانی،
ائلین چیخدی ارشه آهی-آمانی،
بهرام دایی محاربه زامانی،
یئددی کنده چؤرک وئریب، تاغاییم،
ائله اورک-دیرک وئریب، تاغاییم.
کندده چوخو آجین‌دان قان قوسوردو،
جاناوارلار ائو-ائو قاپی پوسوردو!
آرواد-اوشاق قورخوسون‌دان سوسوردو،
اوت اوتلاردی گون‌لر ایله، تاغاییم،
درد گلردی ایلدن-ایله، تاغاییم.
کند یولویلا آنا، بالا گئدنده،
آج جاناوار قفیل هوجوم ائدنده،
سینه‌لرین پارچالاییب دیدنده،
بو درد دیلده آغی اولدو، تاغاییم،
ائلین سینه داغی اولدو، تاغاییم.
کند مسجیدین ائتدین تاخیل آنباری،
دولدو اورا نئچه ایللر دن-داری،
ییخدی بیزی ایلاهی‌نین آه-زاری،
دؤیدوک یاسدا دیزیمیزه، تاغاییم،
هئچ گلمدیک اؤزوموزه، تاغاییم.
وار علینده ایلاهی‌نین اساسی،
آلیر بیزدن گونبگون‌دن قیساسی،
بابی اولدوق، واللاه، سؤزون قیساسی،
آچیلمادی دین قاپیمیز، تاغاییم،
چوخ قیریلدی بخت ساپیمیز، تاغاییم.
موسلوم عمیم قیزیلجایلا چارپیشدی،
یاندی بدن خسته‌لیک‌دن آلیشدی،
قیزدیرما‌دان گئجه حالی قاریشدی،
هکیم، درمان تاپیلمادی تاغاییم،
اؤلدو دردی چاپیلمادی، تاغاییم.
مئیرنسه‌نین اوریین قم بؤلنده،
آتا ننم داما‌دان دوشوب اؤلنده،
آتام، عمیم یئتیم‌لیگی بیلنده،
آنا دئییب هارای سالدی، تاغاییم،
ائوله دولو یئتیم قالدی، تاغاییم!
تک، کؤمک‌سیز آتام قوزو اوتارمیش،
سامان‌لیقدا قوزولارلا یاتارمیش،
قورد اؤزونو سورو اوسته آتارمیش،
جاناواری قوولایارمیش، تاغاییم،
دینیله هوولایارمیش، تاغاییم.
ارسیز قالان گلین‌لرین آغلادی،
جاوان ایکن باشا قارا باغلادی،
قان‌لی ساواش قاپی‌لاری باغلادی،
ایگیدلری آلدی قاچدی، تاغاییم،
ائلی درده سالدی قاچدی، تاغاییم.
جاوان‌لارین جبهه‌لره گئتدی‌لر،
گئدیب اوردا یوخا چیخیب، ایتدی‌لر،
روهلارییلا اوبامیزا یئتدی‌لر –
دولاندی‌لار یوخولاردا، تاغاییم،
آهین باتدی قورخولاردا، تاغاییم.
او ایللرین قورخوسون‌دان چیخمادیق،
سینه‌میزده قورخو هووون ییخمادیق،
قیبله‌میزه، تانریمیزا باخمادیق،
سن ده گولدون آغلیمیزا، تاغاییم،
توکورپه‌دن ناغلیمیزا، تاغاییم.
ایندی شوشا ائرمه‌نین اسیری،
قوروب یاغی قاراباغدا قسیری،
اؤزون سؤیله، ائی اوجاغیم، بو سیرری؟
ائل یولوندا هانی اؤلن، تاغاییم؟
فغانینا وارمی گلن، تاغاییم؟
کندیمیزین قوتاب، کوفته-بوزباشی،
قازان‌لارین بزییدی دم آشی،
سوفره‌لرین سایی‌لاردی لاپ باشی،
ظفرانین اتیرلیدی، تاغاییم،
قوناق‌لارین ختیرلیدی، تاغاییم.
یایما‌لارین اوسته بیچاق چکردیک،
کسدیگیمیز یئرلره ات تؤکردیک،
دوشبرنی خیردا-خیردا بوکردیک،
سو قازاندا قاینایاردی، تاغاییم،
دوشبره‌لر اوینایاردی، تاغاییم.
شورقوغا‌لی، شکربورا، پاخلاوا،
سمنی‌دن حاضرلانان برک هالوا،
دیشیمیزله ائیلیردی جنگ، داوا،
اووجوموزدا سیخی‌لاردی، تاغاییم.
الیمیزه یاخی‌لاردی، تاغاییم،
آنام تاباق ایچره خمیر سالاردی،
چیرپی ییغیب تن‌دیره اود قالاردی،
سویو سپیب اودون کؤزون آلاردی،
کونده‌لری تئز یاپاردی، تاغاییم،
اوزو-گؤزونو اود قاپاردی، تاغاییم.
یایی‌لاردی تن‌دیرین داد اتیری،
آناجیگیم خوش توتاردی ختیری،
یانا-یانا هر یازدیقجا سطری،
اورک ائله آلوو‌لانیر، تاغاییم،
آتش دوشور، اود قوو‌لانیر، تاغاییم.
کنده کؤهنه قبیرسان‌لیق یار ایدی،
آلبان‌لارین خاچ مزاری وار ایدی،
هر قبیرین داشی بیر آه-زار ایدی،
ایتیب-باتدی کئچمیشیمیز، تاغاییم،
بئله اولدو هر ایشیمیز، تاغاییم.
انجیر، اوزوم باغ‌لاری سف دوراردی،
هره اوردا اؤزونه ائو قوراردی،
دوشاب‌لاری کوپه‌لره ووراردی،
مورببه‌سی، ایرچا‌لی بول، تاغاییم،
اورا‌دان دا دنیزه یول، تاغاییم.
شورا گلدی، هامی‌سینی ییخدی‌لار،
بو باغ‌لارین آخیرینا چیخدی‌لار،
اؤز ائلینده خالقا قولتک باخدی‌لار،
چوخ داغیلدی خانیمان‌لار، تاغاییم،
قاییتماز کی، کئچن آنلار، تاغاییم؟
کنددن قیراق شیمالدا بیر سدد واردی،
سددین بورنون دنیز سویو اوواردی،
قوزولاری سدده کولک قوواردی،
بیز ده قورخوب هورکوشردیک، تاغاییم،
چؤلده، دوزده برکیشردیک، تاغاییم.
گیلگیلچایی دلی-دولو آخاردی،
یاز زامانی بره‌سینی ییخاردی،
شاهه قالخیب مجراسین‌دان چیخاردی،
اوچورداردی چال-چپری، تاغاییم،
چای دا ائله شیلتاق پری، تاغاییم.
سئل گلنده دؤندو ناغیل دیوینه،
قاچدیق گئتدیک گنجا‌لی‌نین ائوینه،
یازدیم بونو خاطره‌لر سئوینه،
چای جان‌لارالا گولشیردی، تاغاییم،
اوشاق-بؤیوک اللشیردی، تاغاییم.
کند یئرینده توغای کندی اولوبموش،
هانسی روزگار تئل‌لرینی یولوبموش؟
بلکه یاغی، بلکه روزگار دولوبموش،
آدی قالیب، اؤزو یوخدو، تاغاییم،
اوجاغی یوخ، کؤزو یوخدو، تاغاییم.
کول دیبین‌دن بنؤوشه‌لر آچاردی،
چؤل‌لرینده دووشان‌لارین قاچاردی،
سما‌لاردا شاهین‌لرین اوچاردی،
بولودلارین آخیشاردی، تاغاییم،
بیر-بیریله باخیشاردی، تاغاییم.
او شیدیریغی یاغیش‌لارین یاغاردی،
گئجه‌لره پروانه آی دوغاردی،
زولمتی‌نین بوغازین‌دان بوغاردی،
اولدوزلارین گؤزلشردی، تاغاییم،
اؤز دیلینده سؤزلشردی، تاغاییم.
چمین ایچی لیل سولارلا دولاردی،
جامیش‌لارین اؤزون اوردا بولاردی،
آخشام چاغی هامی چاش-باش قالاردی،
قامیشلیغا های دوشردی، تاغاییم،
جامیش‌لارا وای دوشردی، تاغاییم.
مزارلارین چوخ اوست-اوسته قازیلدی،
هر مزارا بیر باش داشی یازیلدی،
تاریخی‌نین یول-ایریزی آزیلدی،
اؤلن‌لرین اونودولدو، تاغاییم،
هر اؤلنچین قم اودولدو، تاغاییم.
قاری‌لارین خشیل-قویماق چالاردی،
سمنینی دؤیوب هالوا سالاردی،
خیر-خینگا‌لی، اریشته‌سی قالاردی –
گون‌دن-گونه، آیدان-آیا، تاغاییم،
خؤرک‌لرین گلمز سایا، تاغاییم.
رفیمیزه چینی کاسا دوزردیک،
بیر اوتاغی قوناق اوچون بزردیک،
دام-داشیندا بیر یئنی‌لیک گزردیک،
هیت-باجا کورونردی، تاغاییم،
هر شئی تزه گؤرونردی، تاغاییم.
نوو داشیندا اوزوم‌لری ازردیک،
سونرا اونو تاوا‌لارا سوزردیک،
اود اوستونده ایرچال‌لارلا کؤزردیک،
مورببه‌لر قالدی قیشا تاغاییم،
کوپه‌لردن داشا-داشا تاغاییم.
اینک دوغدو آنام آغوز ساغاردی،
قازان‌لاری اوجاق اوسته ییغاردی،
کلکه‌سی هر کاسایا سیغاردی،
پئندیرتکی کسی‌لردی، تاغاییم،
کیم یئمه‌سه کوسولردی، تاغاییم.
زولمت قاچیب سحر نفس درنده،
آنام سودو لین‌لره سرنده،
گونش قالخیب پنجرنی گرنده،
ایشه-گوجه قاچیشاردیق، تاغاییم،
آریتکی اوچوشاردیق، تاغاییم.
گئیینردیک آل-قیرمیزی دون‌لاری،
ایسیدردی بو تزه‌لیک جان‌لاری،
یادداشیمدا ایز قویان خوش آنلاری،
هئچ اونودا بیلمییرم، تاغاییم،
او زامان تک گولمییرم، تاغاییم.
قونوم-قونشو ائویمیزه گلردی،
دردی-سری آنام ایله بؤلردی،
بیر-بیریله پیچیلداشیب گولردی –
بوی-بوخون‌لو گؤزل‌لرین، تاغاییم،
هارادا قالدی او ایللرین، تاغاییم؟
خالیده‌نین گنج قیز ایکن اؤلمه‌سی،
ازراییلین بئله واخت‌سیز گلمه‌سی،
آناسی‌نین، اوی بالام، وای کلمه‌سی!
توک اورپتدی باشیمیزدا، تاغاییم،
سئل اولدو گؤز یاشیمیزدا، تاغاییم.
یای گلنده خزره اوز توتاردیق،
اؤزوموزو گور سولارا آتاردیق،
ایستی قوم‌لار اوستونده‌جه یاتاردیق،
هئچ نه چاتماز اؤتن‌لره، تاغاییم،
خیالیمدا بیتن‌لره، تاغاییم.
شن، سئودا‌لی گون‌لریمیز اؤتوشدو،
چوخ یارا‌لار اورک‌لرده بیتیشدی،
اؤتن اؤمرون قوجالییغی یئتیشدی،
قبیرلرین گولزارلاندی، تاغاییم،
آهیل‌لارین مزارلاندی، تاغاییم.
زینیت خالام اوجا بوی‌لو بیر خانیم،
باغلی ایدی تک قیزییلا خوش آنیم،
او بالاجا خانیمی قلب مئهمانیم،
علیم یئتمیر چوخ‌دان اونا، تاغاییم،
اهوالیما گلیب یانا، تاغاییم.

خانیمباجی بیبیمی قم یوخلادی،
اوغول دردی اوریینی اوخلادی،
گؤزون یومدو ابه‌دی‌لیک یوخلادی،
رهمت‌لیگی درد آپاردی، تاغاییم،
بو دونیا‌دان تئز قوپاردی، تاغاییم.
آتام هئچ واخت کئچیرمزدی نامازی،
در-دیواری دولاشاردی آوازی،
قلب ایچینه یایی‌لاردی نواسی،
دیلردی جان ساغ‌لی‌لیغی، تاغاییم،
دینه اولان باغلی‌لیغی، تاغاییم.
نارینج خالا چرکنی آلاردی،
آوازییلا مج‌لیسه سس سالاردی،
هوزره گلن قادین‌لارین دولاردی،
بیر سس ایله آغلاشاردی، تاغاییم،
روح‌لار ایله باغلاشاردی، تاغاییم.
گئجه سیخیب کؤینیینی سرردی،
اولدوزلاری گؤی‌دن بیر-بیر درردی،
آی زولمتین قول‌لارینی گرردی،
باش بالیشا آتی‌لاردی، تاغاییم،
سهردک یاتی‌لاردی، تاغاییم.
نئهره‌میزه آنام قاتیق تؤکردی،
آغزین برک-برک سله ایله بوکردی،
چالخالاییب یاغین اوزه چکردی،
ییرغالاییب اولدوراردی، تاغاییم،
یاغ بارداغین دولدوراردی، تاغاییم.
قوزولاری قویون‌لاردان آلاندا،
هارایلاییب کوزولره سالاندا،
قاری‌لارین سوددن قاتیق چالاندا،
بیچاق وورسان کسیلمزدی، تاغاییم،
هئچ اوستونده اسیلمزدی، تاغاییم.
دئییرلر کی، قولئیبانی گلردی،
قاپ-باجانی دؤیوب اوزه گولردی،
قیز-گلین‌لر قورخوسون‌دان اؤلردی،
توک اورپه‌دن ناغیل‌لاری، تاغاییم،
رام ائدردی عقل‌لاری، تاغاییم.
اوغلان‌لارین چیلینگاغاج اویناردی،
نرلر تکی قاچیشاردی، قایناردی،
آنا‌لارین باشی ایشدن آیناردی،
بالا‌لارین سسلیردی، تاغاییم،
اورکده عشق بسلیردی، تاغاییم.
گنجلیگیمیز اؤتدو، کئچدی نئیلدیک؟
سئودامیزا جانی قوربان ائیلدیک،
بیر-بیرینه جان دئییب، جان سؤیلدیک،
یامان اؤتدو ایللریمیز، تاغاییم،
یئتیشمه‌دی دیل‌لریمیز، تاغاییم.
اؤتن‌لره آغی دئین نئییمسن،
اورییمده تاقتیمسن، هئییمسن،
خیال‌لاری سرخوش ائدن مئییمسن،
قوی دولانیم من باشینا، تاغاییم،
قوربان اولوم دام-داشینا، تاغاییم.
آنام ساجی اوجاق اوسته قویاردی،
کونده‌لری ال ایچینده اویاردی،
لاواشی‌نین ایگین ارشه یایاردی،
اونوتمارام اوجاغینی، تاغاییم،
کؤنله ملهم قوجاغینی، تاغاییم.
بیشن زامان ایستی تن‌دیر چؤریی،
اتری ایله مست ائدردی اوریی،
قیزاراردی قادین‌لارین بیلیی،
یاناق‌لاری آل اولاردی تاغاییم،
بیشن چؤرک بال اولاردی، تاغاییم.
تن‌دیر اوستو قاری‌لارلا دولاردی،
بیر-بیرینه سؤزله هیان اولاردی،
چؤرک‌لرین اتری گؤیده قالاردی،
نعمت ایدی قارنیمیزا، تاغاییم.
ی دولاردی بورنوموزا، تاغاییم،
سوبه گؤزونو آچار-آچماز دوراردیق،
سسیمیزی باشیمیزا ووراردیق،
هؤروک‌لری اوفا-اوفلا داراردیق،
تئز مکتبه یوللاناردیق، تاغاییم،
گونده‌لیکله قوللاناردیق، تاغاییم.
اتیره‌نین، رهیله‌نین گولوشو،
حلیمه‌نین، شوکوفه‌نین یئریشی،
ائلمیرانین مؤجوزیدی هر ایشی،
نغیمیدی جان سیرداشیم، تاغاییم،
ایندی کیمله پیچیلداشیم، تاغاییم؟
قوجا‌لارین اوندا هله ساغ ایدی،
مکتبیمیز بیزه پاک اوجاغ ایدی،
هامیمیزین کئف-داماغی چاغ ایدی،
اوشاقلیغیم شیرین-شکر، تاغاییم،
یوخولارا منی چکر، تاغاییم…
صینیفمیزین واردی بیرجه شاکیری،
اوخوماغا هوسلیدی فیکیری،
دالاشاندا هئچ یوخ ایدی مکیری،
بیلیگی ده یئددی قات‌دان، تاغاییم،
نیه چیخمیر هئچنه یاددان، تاغاییم؟
آتام آخشام گونده‌لیگی آچاردی،
بئش گؤرنده سئوینجین‌دن اوچاردی،
دیلیمیزده کیتاب‌لار اود ساچاردی،
علمیمیزی داشدیراردی، تاغاییم،
زیروه‌لری آشدیراردی، تاغاییم.
کیتاب‌خانا اوشاق‌لارلا دولاردی،
کیتاب اوسته مرکه‌لر سالاردی،
بیر-بیری‌نین یئنه کؤنلون آلاردی،
یامان‌لیغی اوشودردیک، تاغاییم،
جان دئییب، جان ائشیدردیک، تاغاییم.
بیر سادت اوخوم دیدی داشلارا…
گؤزوم باتدی آهلار بوغان یاش‌لارا،
قار النیر ساچا، تئله، قاش‌لارا،
اوشاق‌لیغی منده گزمه، تاغاییم،
قوناق اولسام کؤن‌لو اوزمه، تاغاییم.
اقرب قاچیر سویا هسرت سئل کیمی،
ساعت‌لاریم آیریلیرلار یئل کیمی،
نه وار سؤیله، جانا شیرین ائل کیمی؟
اورییمی سالدین کؤزه، تاغاییم،
چوخ آچمیسان قوینو بیزه، تاغاییم.
آیازی‌نین شاختاسیندا دونموشام،
قیش گلنده یای-یازینی آنمیشام،
سئوگیلیتک من اودونا یانمیشام،
ایستییمی گتیر یادا، تاغاییم،
چوخ آلیشیر دوشن اودا، تاغاییم.
مهببتین اورییمده داشیردی،
دلی تکی داغ‌دان، داش‌دان آشیردی،
قؤور ائله‌ین یارامی درد قاشیردی،
ائیلمدین بونا چاره، تاغاییم،
ساغالماییر دئمه یاره، تاغاییم.
اوزاق دوشموش خاطره‌لر اویودو،
کیرین-کیرین یامان من‌دن سویودو،
خولیا‌لارین نه درین بیر قویودو؟
دوشوب قالیب زامان‌لاریم، تاغاییم،
پوزولوبدو سهمان‌لاریم، تاغاییم.
بدنزرین یامان گؤردوم اوزونو،
جامیشیمیز ووردو یئره اؤزونو،
اوندا بیلدیم کسرده ائل سؤزونو،
آهی چیخدی یئره-گؤیه تاغاییم،
فریادینی بوغدو پیه، تاغاییم.
یامان‌لارین، نیسگیل‌لرین آغلادی،
اورییمده کؤچ سالیب، سؤز باغلادی،
کؤزون آتیب باغریم-باشین داغلادی،
اؤتن‌لری هارایلادی، تاغاییم،
میصراع-میصراع سارایلادی، تاغاییم.
سئییدرزا، قریب مممد ایران‌دان،
آیری‌لیق دا دیله دوشور سوران‌دان،
چالیشدی‌لار ایشده، آلا-توران‌دان،
اوزلری‌نین نیسگیل‌لری، تاغاییم،
آچیلمادی موشگول‌لری، تاغاییم.
جنوب دردی قلب‌لرینی اوخلادی،
آغری‌لاری اورک‌لرین قوخلادی،
گؤزلرینده هسرت‌لری یوخلادی،
وطن عشقی اولمور تالان، تاغاییم،
کیم‌دیر اونو قلب‌دن آلان، تاغاییم؟!
جاهان ننه تئز-تئز بیزه کئچردی،
آنام اونلا دردلشیب چای ایچردی،
ظالم اؤلوم جانا یوووق نه چردی؟
آلدی-قاچدی قوجا‌لاری، تاغاییم،
قالدی توستو باجا‌لاری، تاغاییم.
سفوریله بانو اوشاق توتاردی،
دوغولانلا بیر سومیه‌ده یاتاردی،
اورسو ننه تئز هارایا چاتاردی،
اسب‌لری داری‌لاردی، تاغاییم،
نوه‌لرله سورولاردی، تاغاییم.
فرروخ ننه ساکیت-سس‌سیز گزردی،
قونشولوقدا بیزی عشقله سوزردی،
لایلاسینا شیرین-شکر دوزردی،
نوه‌لرین اوخشایاردی، تاغاییم،
سؤز اؤزو ده باخشا یاردی، تاغاییم.
آینیسه‌نین کنده قوناق گلمه‌سی،
یون جورابدا رنگ‌لی ناخیش ایلمه‌سی،
هر میلی‌نین اؤز دیلینی بیلمه‌سی،
جهرسیله اوخوناردی، تاغاییم،
بارماق‌لارلا توخوناردی، تاغاییم.
میرفئیزوللا-سئییدکوبرا اوجاغی،
زلیل باهار او ائودن بیر قم داغی،
نزیر ائدن تئز تاپاردی خوش چاغی،
پیغمبرین نسی‌لیدی، تاغاییم،
مقدس‌لر اصیلیدی، تاغاییم.
سریه‌نین، گولزادانین زحمتی،
اوزلرینده مئهریبان‌لیق نعمتی،
آتامیزین خالا‌لارا حؤرمتی،
دوداغیندا سسلنردی، تاغاییم،
قم سوزالیب، سوسلنردی، تاغاییم.
روبابه‌نین او اوغول‌سوز هارایی،
تک دام آلتدا اوغولدایان آه-وایی،
قورتارمیردی دردلری‌نین هئچ سایی،
قمی ارشی قارسیییردی، تاغاییم،
قم اؤزو ده یانسیییردی، تاغاییم.
هماییلین هارای-هشیر سالماسی،
گور سسیله یادداشیمدا قالماسی،
اؤرتوگونو دونگه ووروب چالماسی،
او، آناما امیقیزی، تاغاییم،
سؤندو گئتدی بخت اولدوزو، تاغاییم.
الکیرامین قفیل گلن قم یاسی،
یئتیم قالدی آروادی، اوچ بالاسی،
بیبیم اوغلو پاشا – اوغول قالاسی،
تاهیره‌نین یاشین گؤردوم، تاغاییم،
درده دوشموش باشین گؤردوم، تاغاییم.
جابیر داییم حیوان‌لاری دؤیردی،
جبیرلیگی خاطریمه دیردی،
اسبلشیب ایت-پیشیگی سؤیردی،
من ده اوندان یان قاچاردیم، تاغاییم،
اورییمه درد آچاردیم، تاغاییم.
رضا عمی آتامین قان قوهومو،
داوا ائتدی ارشه آتدی آهیمی،
دوداغیمدا قوپارتدی گاه-گاهیمی،
آتام ایله یوللاشمادی، تاغاییم،
دوغما تکی باللاشمادی، تاغاییم.
عبداللهنی چوخ داوادا اولماسی،
آلمانیادا اسیر دوشوب قالماسی،
مئهرین بیزیم کندیمیزه سالماسی،
او، آلمانلا روسو سؤیدو، تاغاییم،
اؤمرو بویو حاقی اؤیدو، تاغاییم.
قاراچؤپو ییغیب شله باغلاردیق،
چتین ایشین سینه‌سینی داغلاردیق،
ایلان گؤردوک قورخوب، هورکوب آغلاردیق،
شله چینی آغریداردی، تاغاییم،
آهیمیزی باغیرداردی، تاغاییم.
قاچیب چایا تور توربا‌لار آتاردیق،
خیردا چاپاق بالیق‌لاری توتاردیق،
قورو بیان ییغیب اوجاق چاتاردیق،
ایسیدردیک الیمیزی، تاغاییم،
هیس توتاردی تئلیمیزی تاغاییم.
سونبول‌لری کومباین‌لار بیچردی،
بیچینچی‌لر آیران، قاتیق ایچردی،
خزر اوستن گونش داغا کئچردی،
قیز-اوغلان‌لی توپلاناردیق، تاغاییم.
اکین بویو ساپلاناردیق، تاغاییم،
کندچی‌لرین برکتله یاشاردی،
زمی‌لرین دنله آشیب-داشاردی،
سونبول‌لرین بویوموزدان آشاردی،
هورکه-هورکه دن ییغاردیق، تاغاییم،
بیر-بیریله تن ییغاردیق، تاغاییم.
کولانی‌لی مممدباغیر آت اوسته،
قیرمانجینی هایلایاردی آهسته،
قارووولچو پئشه‌سینه لاپ خسته،
بیزی آتلا قوولایاردی، تاغاییم،
دیله توتوب توولایاردی، تاغاییم.
کیسه‌میزده باششاغی‌لار داشاردی،
دولدوردوقجا کیسه‌لردن آشاردی،
گؤزتچی‌نین سسی قیزیب جوشاردی،
اوستوموزه کوکریردی تاغاییم،
کیسه بئلی لاپ ایردی، تاغاییم.
شیغییا‌راق اوستوموزو آلاردی،
قوووب آتلا کیسه‌میزی چالاردی،
زحمتیمیز گؤزتچییه قالاردی…
اوت ایچینه بوکولردیک، تاغاییم،
آغلاشا‌راق اکیلردیک، تاغاییم…
اوشاق‌لیق دا تئزجه گلیب اؤتوشدو،
بیز بؤیودوک، گنج‌لیک چاغی یئتیشدی،
بختیمیزه اوزوملوکده ایش دوشدو…
تالئ یولوم اوردان کئچدی، تاغاییم،
کاروان-کاروان عؤمور کؤچدو، تاغاییم.
باغ‌لاریندا مئینه‌لرین بول ایدی،
قیز-گلی‌نین تالئیینه یول ایدی،
آغیر بئل‌دن سیزیلدایان قول ایدی،
زحمت‌لره بورونوردوک، تاغاییم،
ایلان تکی سورونوردوک، تاغاییم.
مممدباغیر سلیمنی یانلادی،
بیزیم سیرا دالا قالیب آنلادی،
اوزون توتوب بی آدیمی دانلادی،
اییلمیرسن دئدی منه، تاغاییم،
بو تپکی‌لر نیدی منه، تاغاییم؟
بی آدینی باشیمیزا قاخدی‌لار،
هر آددیمدا بیزه قارا یاخدی‌لار،
آدیمیزا ائلده اؤگئی باخدی‌لار،
بو آغرینی بیزله چکدین تاغاییم،
اوجاق یاخان کؤزله چکدین، تاغاییم.
قادین‌لارین علی سولوق آتاردی،
ایشدن سونرا بئله شله چاتاردی،
قیز-گلین‌لر شله آلتدا یاتاردی،
بو عذابین اؤزون گؤردوم، تاغاییم،
هر ناقی‌سین اوزون گؤردوم، تاغاییم.
جرگه-جرگه قیزلار کتمن ووراردی،
کیم یورولدو، نفس آلیب دوراردی،
مممدباغیر او ساعت وای قوراردی،
شیریم آچدی باغیریمدا، تاغاییم،
بونو داددیم آغیریمدا، تاغاییم.
گلین‌لرین دؤزموب بالا سالماسی،
قزبلنیب بو زولوم‌دن دولماسی،
اوزلرینده گؤزللیگین سولماسی،
آغاراردی تئل‌لرینده، تاغاییم،
ازابلییدی ایللرین ده، تاغاییم.
هلمه خالا اون داشینی سالاردی،
بوغدا تؤکوب اوندان یارما آلاردی،
داشین سسی عالمه سس سالاردی،
سیییغین‌دان اتیر قالیب، تاغاییم،
اورییمده ختیر قالیب، تاغاییم.
ایمامیلین آغیریانا اولماسی،
خانیم کیمی ختیرلری آلماسی،
بانو ایله بیرگه گونو قالماسی،
دوشدو ائله آغیزلارا، تاغاییم،
من ده سالدیم کاغیذلارا، تاغاییم.
قاب-قاجاغی بولاق اوسته یویاردیق،
بیر-بیرینی پیچهاپیچلا دویاردیق،
آنامیزین گؤزون یولدا قویاردیق،
اوشاغلیغا قاریشاردین، تاغاییم،
کؤنلوموزه ساریشاردین، تاغاییم.
ایسماییلین سو ماشینی گلردی،
آروادلارین بختی اوزه گولردی،
سو اوستونده اسب‌لر ده ملردی،
وئدره‌لری تئز قاپاردیق، تاغاییم،
اوزون یولو سو آپاردیق، تاغاییم.
آغرین کئچیب اورییم‌دن آشاردی،
یادداشیمدا خاطره‌لر یاشاردی،
اوشاق ایکن شادلیق‌لاریم داشاردی،
بوی وئرردی باشیم اوستن، تاغاییم،
اوخشایاردین منی پست‌دن، تاغاییم.
یای اؤز کؤچون گون اوستونه چاتاردی،
ائل-جاماات دام اوستونده یاتاردی،
گئجه اولدو یاستیغا باش آتاردی،
خزر یامان گورولداردی، تاغاییم،
فیرتینانی گور اوداردی، تاغاییم.
یاغیش اولدو پالچیق دام‌لار داماردی،
ایشین قویوب هامی داما جوماردی،
آیاق آلتدا چات‌لار داممار-داماردی،
ایش-گوجوموز اؤتوشمزدی، تاغاییم،
دینجلیگیمیز یئتیشمزدی، تاغاییم.
آخشام آنام لامپا اوسته اثردی،
لامپامیزین پیلته‌سینی کسردی،
ال وورسایدیق یامان بیزدن کوسردی،
ایشیغیمیز کورلاشاردی، تاغاییم،
گؤز توتولوب، کور آشاردی، تاغاییم.
دریازلارلا اوت بیچیلیب دولاردی،
آدام‌لارین یابا‌لاری اولاردی،
هیت‌لرده تایا‌لاری سالاردی،
زحمت اوزده قیریشاردی، تاغاییم.
ایشلر یازدا قاریشاردی، تاغاییم،
زامان اؤتدو اوشاق‌لارین یئکلدی،
سینه‌لردن مین بیر قایغی دیکلدی،
گنجلیگیمیز قاپی آچدی، تئز گلدی،
سالدی بیزی جیغیرلارا، تاغاییم،
تالئ گولمز فاغیرلارا، تاغاییم.
اوباشداننان خوروز بانی باش‌لاردی،
یاتان‌لارین قولاق‌لارین داش‌لاردی،
سحر شئهی باغ-باغاتی یاش‌لاردی،
قارانلیغین ایچی شردی، تاغاییم،
سوبهوموزه گون دوشردی، تاغاییم.
نؤهددین ده آل شراب‌دان ایچردی،
لئنینی چوخ سؤیوب سددی کئچردی،
او دا، بیر گون بو دونیا‌دان کؤچردی…
سن کی، بونا شاهید اولدون، تاغاییم،
اؤلن‌لره ساچ دا یولدون، تاغاییم!...
زامان ائله اوچوب گئدن قوش اولدو،
هر اؤمرون پاییزیندا قیش اولدو،
جاوان جانیم قوربت‌لره توش اولدو…
بورنوموزون اوجو گؤینر، تاغاییم،
سن‌دن آیری دوشن نئینر، تاغاییم؟
گلدی، گئتدی اوشاغلیغین هاواسی،
سیزیلتی تک قالدی قلبده داواسی،
جان‌دان چیخماز هئچ بیر کسین یوواسی…
ایگی گلر یئل‌لر ایله، تاغاییم،
کؤنلومده‌سن ایللر ایله، تاغاییم.
ائو-ائشیک‌لی اولدو باجی-قارداشیم،
دردلرینه گیردی، چاپدی چوخ باشیم،
قلم اولدو عؤمورله یول یولداشیم،
بئله یازدی قدر منه، تاغاییم،\
آگاه ائتدیم بونو سنه، تاغاییم.
آتا ائوده چوخ قیزلارین قاریدی،
ار ائوینده آز بیری‌سی یاریدی،
عؤمورموز ده ربب علینده داریدی…
سپدی، بیچدی، حیسه-حیسه، تاغاییم،
توش اولماسین هئچ کیم پیسه، تاغاییم.
جاوان‌لارین واخت یئتنده توی ائتدی،
سادتله ائله، یوردا های ائتدی،
سینه‌لرده سئوینج‌لری چای ائتدی!
اؤزون گؤردون نش‘ه‌لرین، تاغاییم،
جاندا شادلیق گوشه‌لرین، تاغاییم!...
ایزلرینده، جیغیریندا ایتمدیم،
کؤنله دوشمز هایا-هویا گئتمدیم،
من بولبولم، قازلار تکی اؤتمدیم،
سن بیلیرسن ووقاریمی، تاغاییم،
سویا اولان ایلقاریمی، تاغاییم.
عزیزلریم دؤندو اولدو یاد منه،
هئی وئردی‌لر کدر دولو داد منه،
بو اؤمرومو ائتدی‌لر هئچ زاد منه،
هیچقیرتی‌لار قلبده یاتدی، تاغاییم،
یاخشی-یامان، بو حیاتدی، تاغاییم.
بیر کیمسنی تبیمتک یار بیلمدیم،
عؤمور اؤتدو واختینی دار بیلمدیم،
قلمیمی کاغیذا بار بیلمدیم،
میصراع‌لاریم آمان ائتدی، تاغاییم،
بو آمانی یامان ائتدی، تاغاییم.
قؤنچه-قؤنچه گول‌لرینده اتیر وار،
ایستک اولسا، سئوگی دولو ختیر وار،
هر سؤزومده هیجران دولو سطر وار،
سن ده دوغدون ختیرلردن، تاغاییم،
بوی‌لانیرسان سطرلردن، تاغاییم.
خیدیرزینده اوجا داغ‌لار باشیندا،
یویوناردی بولودون گؤز یاشیندا،
قاری‌لارین نزیری دام-داشیندا،
بویلاناردی کنده ساری، تاغاییم،
یوخ ائدردی آهی-زاری، تاغاییم.
کند یئری‌نین آدی توغای، دئییلدی،
گؤزوم آچدیم توغای-تاغای دئییلدی،
قوجا‌لارین دیل‌لرینده اؤیولدو،
آدی قالیب، اؤزو هانی، تاغاییم؟
کیم داغیدیب بو اونوانی، تاغاییم؟
اورییمده آجی‌لاریم وای کیمی،
توشلانیبدی اورییمه یای کیمی،
یئردن قوپوب گؤیه دییر های کیمی!
بو هاییمی سن ده اوخو، تاغاییم،
سیننی چک، دیر اوخو، تاغاییم!
سنله اولان گون‌لریم بیر یوخودو،
بو یوخونو تالئ منه اوخودو،
بورونومدا قالان شیرین قوخودو،
خوش قوخودان بوی‌لانیرسان، تاغاییم،
باشیم اوسته های‌لانیرسان، تاغاییم.
ایندی منه داها عزت وئرمیرسن،
کئچنلرتک آرتیق لزت وئرمیرسن،
پئیمانیما بیر یوللوق قت وئرمیرسن،
داماغیمدا قالدی دادین، تاغاییم،
اورییم‌دن چیخمیر اودون، تاغاییم.
گلین گلدی، آتا ائویم یادلاشدی،
اؤتن گون‌لر آغزیمیزدا دادلاشدی،
اورییمده بو آغری‌لار اودلاشدی،
یاد قیزی‌نین وارمیش اوزو، تاغاییم،
قاچاق سالدی ائودن بیزی، تاغاییم…
گون‌لر زهر تؤکور قئی‌لو-قالیما،
من یانیرام، سن ده بیر یان حالیما،
قوجا آنام گؤزون دیکیب یولوما…
بو سینم‌دن دور گل قوپار، تاغاییم،
اورییمی اورا آپار، تاغاییم.
سسیمیزی، سمریمیزی ایتیردیک،
چول-چوجوغا امریمیزی ایتیردیک،
سئودا دولو اؤمروموزو ایتیردیک،
نه تئز اؤتدو هونر چاغی، تاغاییم؟
اؤتن گون‌لر اولدو آغی، تاغاییم.
یاز آیی‌نین چیچک‌لری آچدی‌لار،
اتیرلری بورنوموزدا ساچدی‌لار،
یای گلممیش باغ-باغچا‌دان قاچدی‌لار،
بیهوش ائتدی منی حالین، تاغاییم،
بو اولایدی قئی‌لو-قالین، تاغاییم.
یاخشی‌لیغی آغلاتدی‌لار قول کیمی،
اعتباری خرجله‌دی‌لر پول کیمی،
ربب هر اؤمرو اؤتوب کئچدی یول کیمی…
بیزدن قالدی یاخشی-یامان، تاغاییم،
هر کسه ده گولمور ایمان، تاغاییم.
پاک آتامین – آغبالانین وفاتی،
یئتیم‌لیکله قمه باتان حیاتی،
یامان چاپدی ازراییلین بد آتی،
آلدی قاچدی عزیزیمی، تاغاییم،
نئجه بوکدو درد دیزیمی، تاغاییم؟!
آتام گئتدی، شانیم گئتدی علیم‌دن،
خوش نؤو‌راق‌لی آنیم گئتدی علیم‌دن،
ائله بیل کی، جانیم گئتدی علیم‌دن،
سن آهیمین اؤزون گؤردون، تاغاییم،
اورییمین کؤزون گؤردون، تاغاییم.
ظالم فلک دردلریمی چؤزمه‌دی،
عذاب‌لاری اورییم‌دن اوزمه‌دی،
منیم تکی آتا دئییب گزمدی…
آتاملایدی دادین-دوزون، تاغاییم،
دردین آغیر، دردین اوزون، تاغاییم!
عمیم قیزی هوسنیه‌نین اؤلومو،
میوس ائتدی قارا خبر ائلیمی،
چوخ یاندیردی آغی دئین دیلیمی،
بی عمیمین خانیم قیزی، تاغاییم،
نه دهشت‌لی اولدو یازی، تاغاییم؟!
هر گولبانی بیبیم قارداش دئینده،
آغری-آجی اوریینی یئینده،
ظالم اؤلوم قلب قاپی‌سین دؤینده،
باغریم-باشی پارچالاندی، تاغاییم،
گؤزلریمه قان جالاندی، تاغاییم،
سکینن ده ایتغی‌لره دؤزمه‌دی،
یازیق بیبیم عؤمور کؤچون سئزمه‌دی؟
ییغین-ییغین آغری‌لاری چؤزمه‌دی،
سینه‌سینده قم داشیردی، تاغاییم،
قوربت ائلده جان تاپشیردی، تاغاییم.
بی بابامین بالا‌لاری گئتدی‌لر،
اوزو سویوق مزارلارا یئتدی‌لر،
کئچن گون‌لر نیه بئله اؤتدولر؟
هئچ قاییتماز بیر ده گئری، تاغاییم،
اؤلن اؤلو، بیز ده دیری، تاغاییم.
اؤلن‌لرین آه-وایلا جان وئرنده،
ظالم اجل جیسمی‌دن جان درنده،
گؤز یاشینی ببک‌لره سرنده،
گؤی اوزونو بولود آلدی، تاغاییم،
گؤزوم یورددا، ائلده قالدی، تاغاییم.
آتام اؤلدو، ائو-ائشیگی یاد اولدو،
آغزیمیزدا اوندان قالان داد اولدو،
قارداشیم دا شوکور سویا آد اولدو،
بو آد اوچون جان وئررم، تاغاییم،
داماریم‌دان قان وئررم، تاغاییم.
آتا ائویم چوخ ائیله‌دی درد منه،
بو آغرینی ائتمه‌دی نامرد منه،
عؤمور کی، وار اولدو سیرلی نرد منه،
گون‌لریمی زر تک آتدی، تاغاییم،
اؤتن‌لرله بیرگه باتدی، تاغاییم.
عزیزلریم اورییمی تکله‌دی،
کؤنولومو کدر اوسته کؤکله‌دی،
یقین ایستک نسیلله‌دی، کؤکله‌دی،
من ده بونو داددیم بئله، تاغاییم،
خیال‌لاریم دؤندو یئله، تاغاییم.
گنج‌لریمیز کنددن چیخیب گئتدیلر…
بعضی‌لری آرزولارا یئتدی‌لر،
بعضی‌لری آرزودان یان اؤتدولر،
سن اونلاری قارشیلادین تاغاییم،
ایستیینی آشیلادین تاغاییم.
دئییرلر کی، شهر آغلی آلاندی،
پارلاقلیغین اورک‌لره سالاندی،
یوردون عشقی سینه‌لرده قالاندی،
من بو عشقی سنده دویدوم تاغاییم،
مئهرینی ده قلبه قویدوم تاغاییم.
سئودا دولو گون‌لریمیز اؤتوشدو،
کؤنلوموزه گاه سئوینج، گاه قم دوشدو،
هر آنی دا باشا وورماق بیر ایشدی،
ایشلریمیز چوخ دولاشدی، تاغاییم،
هیجران گلیب باش‌دان آشدی، تاغاییم.
سئودیک‌لریم چوخ ائتدی‌لر ناز منه،
دردلری بول، سئوینج‌لری آز منه،
قلبیم اولدو سیمی قیریق ساز منه،
من بون‌لاری سادالادیم، تاغاییم،
یادداشیندا قالسین آدیم، تاغاییم.
یالتاغ‌لیغی، مدداه‌لیغی آلدی‌لار،
بیر دب کیمی کیتاب‌لارا سالدی‌لار،
اورک‌لرده بو آدلا دا قالدیلار…
هر دوز سؤزون خئیرینه چیخ، تاغاییم،
تمیزلیگین سئیرینه چیخ، تاغاییم.
سالدیم سنین پاک آدینی کیتابا،
سیغیشاسان تاریخله حاق-حسابا،
زامان بنزر ات دوغرایان قسابا،
بو اؤمرومو آلیب کسر، تاغاییم،
من گئدرم قالار اثر، تاغاییم…
یولون گئدیب گلن‌لره آستانا،
ایلتیفات ائت شاگیردینه، اوستانا،
چئویردیم کی، پاک آدینی داستانا،
بیر سنه ده قیمت اولسون، تاغاییم،
قوی آدینا حؤرمت اولسون، تاغاییم.
دده یوردوم، آتامین اود-اوجاغی،
آچ بالانا آنا کیمی قوجاغی،
گؤسترمه‌سین تانری سنه قم داغی،
ناغیل‌لاشان، سئهیرلشن، تاغاییم،
خیال‌لاشان، سئییرلشن، تاغاییم.
بیر گلیدیم دولانایدیم بوینونا،
سیغینایدیم دوغما ایستی قوینونا،
قاتیشایدیم من اوشاق‌لی اوینونا،
باغ-باغچا‌دان گول اوزیدیم، تاغاییم،
تئل‌لریمه بیر دوزیدیم، تاغاییم.
گل سؤیلمه اوخومورلار شئیری،
شئیر اولوب عقلیمین سئییری،
چوخ دئییرلر ندیر منه خئییری؟
خئییریمی گودممیشم، تاغاییم،
هئچ دالانجا گئتممیشم، تاغاییم.
عؤمور-گونون کئچیب جانا ریشه‌سی،
اوزون یولدا یا قمی، یا نش‘ه‌سی،
ایستیی‌نین قلبه گیریب تیشه‌سی،
اؤتن‌لری قویمور یاتسین، تاغاییم،
کدری‌نین آدی باتسین، تاغاییم.
سینم‌دکی آجی‌لاریم سئللندی،
یئللنچکتک روحی-جانیم یئللندی،
خیال‌لاریم بیرر-بیرر دیللندی،
درد آلاندا اورییمی، تاغاییم،
دوغدو ایلهام ملییمی، تاغاییم.
یئددی قورشاق گؤی‌لرینی چالاندا،
بولودلارین قوووب یئرین آلاندا،
گیلاوارین اووقاتیندا قالاندا،
مئه‌لرینی اوخشایاردی، تاغاییم،
فوسنوکارلیق باخشا یاردی، تاغاییم.
سئودا یولون چمنی‌نین ایچیدی،
اوشاق کؤنلوم بیر دلیجه کئچیدی،
زامانیمین یامان بیچه-بیچیدی،
اوجاغیندا کئچدی عؤمور، تاغاییم،
دوغوموموز حاق‌دان امیر، تاغاییم،

ایندی سنی یوخولاردا گزیرم،
آیری‌لیقلا اورییمی اوزورم،
یئنه، واللاه، بو تاغدا من دؤزورم،
سارالیرام هسرتین‌دن، تاغاییم،
آیری اولماز جان بتین‌دن، تاغاییم.
سنله اولان اؤتن عؤمور یاز منه،
سن‌سیز کئچن بو گون‌لر آیاز منه،
نه دردون وار گؤتور مکتوب یاز من…
اوجاق چاتیم اورییمده، تاغاییم،
کوکره‌سین تب ملییم ده، تاغاییم.
شادیمانین آتشین‌دن اودلاشیب،
آیری دوشوب، دئمه، سنه یادلاشیب،
مهببتین هسرتین‌دن دادلاشیب،
حاقا دعام، تمیز هاوام، تاغاییم،
ائلیم-آراخام، یوردوم-یووام، تاغاییم.

26. 01. 2002 - 8. 03 2006.

نئفت داش‌لاری

یوخاری
© Tanınmış şairə Şirin xanım Kərimbəyli Şadiman. Bütün hüquqlar qorunur.2011.