20 یانوار 1990-جی ایل
شهیدلرینین مقدس روهونا…
سینهسی یارا، باکی،
یاخدیلار قارا، باکی،
یاغینین فیتواسییلا
قاریشدی آرا، باکی.
دیدیلن جانلاریم اوی!
تؤکولن قانلاریم اوی!
باشیم، قوللاریم هانی؟
آخیر کؤکسومون قانی،
قانا سوسایان یاغی،
سن وئردین، آلدین جانی؟
باغلانان یوللاریم اوی!
زنجیرلی قوللاریم اوی!
ایگیدیم اؤلمه دایان،
باغلی گؤزون آچ، اویان،
چرخین ترسه چئوریلسین،
بیزی بو گونه قویان.
لای-دیوار نرلریم اوی!
قئیرتلی ارلریم اوی!
یاغی جانین اوزولسون،
بخت اولدوزون سوزولسون،
باغریما دین گولله
اوریینه دوزولسون.
سوسسوز دوداقلاریم اوی!
سینهده داغلاریم اوی!
لنکراندا اؤلن مرد،
اوزدو بیزی شیون، درد،
قارا گئییب گلردیم…
کسیب یوللاری نامرد.
داغیلان سینهلر اوی!
اوچولان بینهلر اوی!
قالانین یولو باغلی،
قالمیشام قولو باغلی،
گلمهیه یاغی قویمور،
یول گولله دولو، باغلی.
بینهده شهیدیم اوی!
اییلمز ایگیدیم اوی!
دیلیمی باغلادیلار،
سینمی داغلادیلار،
آرخامجا گولنلریم
اوزومه آغلادیلار.
تورپاغا دوشنیم اوی!
قانیندا بیشنیم اوی!
حاقیمی مین یول دئدیم،
وطندن هارا گئدیم؟
قانون-هؤکوم یاغیدا،
کیمه شیکایت ائدیم؟
آی شهید جاوانیم اوی!
باتیریلان قانیم اوی!
مزارسیز قالان، شهید،
وارلیغی تالان، شهید،
تورپاغیندا دوغولوب
تورپاقدان اولان، شهید.
بختسیز ایگیدلریم اوی!
ایتگین شهیدلریم اوی!
ماشتاغا قانا باتیب،
اوردا بیر شهید یاتیب،
تانری قانی گؤرمهدی،
دونیانین آخری چاتیب.
یوللاردا اؤلنیم اوی!
یوزه بؤلوننیم اوی!
ایستکلیم گوللهلندی،
کؤکسو قانا بلندی،
آهیمدان فلیین ده،
گؤزوندن قان الندی.
ناکام سولانلاریم اوی!
شهید اولانلاریم اوی!
یاتاغین بوزا دؤندو،
تالئسیز قیزا دؤندو،
اؤمرون یاغی علینده
سؤنن اولدوزا دؤندو.
ایگید، قورخماز اریم اوی!
دیدیلن هونریم اوی!
بو سینمی قم یارار،
گؤزلریمسه حاق آرار،
شهید آتاسین بالام
اؤمرو بویو آختارار…
اسیر قالالاریم اوی!
یئتیم بالالاریم اوی!
تورپاغا دوشن، باجیم،
جانلا اللشن، باجیم،
شهید سینن دیدیلیب
یویولمور ن‘شین باجیم.
قانلی کؤینکلریم اوی!
اؤلن دیلکلریم اوی!
ن’شیمی تانکلار اوگوب،
جان اوسته مین یول سؤیوب،
محکومام دؤیمه، یاغی،
منی اؤز بختیم دؤیوب.
تک آیاق مزاریم اوی!
بو قانلی گولزاریم اوی!
قارا یانوار نه نهسدی؟
یاغی یوللاری کسدی…
الیالین باکیمی
اؤلدورمهیه تلسدی.
سینان آیاقلاریم اوی!
قانلی بایراقلاریم اوی!
گئجمی گوندوز ائتدیم،
زولومله مرد بؤیوتدوم،
یاغی تانک آلتدا ازدی،
اجب کامیما یئتدیم.
شهید آنانلاریم اوی!
ارسیز سونالاریم اوی!
شهید آنام، باجیم وای،
آشدی باشدان آجیم وای،
کیمه دیل آچیم، الله،
یوخمو بیر الاجیم وای؟
باتیبدی هاراییم اوی!
اوچوبدو ساراییم اوی!
یاغدی گوللهلر قفیل،
بو دردی گؤتورمز فیل،
سن تویلارین قیزییدین
یاسا باتدین قرهنفیل.
آه، قانلی گوللریم اوی!
دهشتلی ایللریم اوی!
نئفتچالانی توتدولار،
سینهسین قاناتدیلار،
تیکهمیز بوغازلاردا
حاقی-سای اونوتدولار.
ببکده سئللریم اوی!
کؤمکسیز ائللریم اوی!
دوشمن تله قوروبدو،
ائوده اوزه دوروبدو،
سینمدن قورخان یاغی
کورییمدن ووروبدو.
قانلی قوجاقلاریم اوی!
سؤنن اوجاقلاریم اوی!
آیاقلاریم یوخ گلم،
سینمیش قوللاریم قلم،
گولله باشدا، سینهده،
اورک جان وئرمیر اؤلم.
دایانان ساعتیم اوی!
پوزولان حیاتیم اوی!
یارام سورر آغلاما،
اوزون سورر آغلاما،
اؤرپیی اوزونه توت،
یاغی گؤرر آغلاما.
آغریلی اورییم اوی!
پوچ اولان دیلییم اوی!
آنام، باجیم قارادا،
مین گولله بیر یارادا،
یاغی قالدی کناردا
بیز قیریلدیق آرادا.
دردلی داغیم، داشیم اوی!
شهید وطنداشیم اوی!
یاغی چیراغین سؤنسون،
سیننه اجل ائنسین،
ناهاق قانلار تؤکهنین
قانی چایلارا دؤنسون.
حاقسیز گوللننیم اوی!
اجلسیز اؤلنیم اوی!
الله، بو نئجه ایشدی؟
سونگو سینمی دئشدی،
باغریمدان کئچن گولله،
مین یول یئرین دییشدی.
زنجیرلی وطنیم اوی!
مین اؤلوب-ایتنیم اوی!
یاغینی درد اییدی،
قاپیسین وای دؤییدی،
سنه دیکیلن گولله
اورییمه دییدی.
بختی کم سئوگیلیم اوی!
اؤز قیسمتیم، گولوم اوی!
قددی اییلن جانیم،
باغری اوگولن جانیم،
اسیرلیک زیندانیندا
حاقسیز دؤیولن جانیم.
زنجیرلی قوللاریم اوی!
حیثیتیم، آریم اوی!
او وای سؤزونه قوربان،
چیخان گؤزونه قوربان،
بیرجه اوغول ایتیرن،
اؤزوم اؤزونه قوربان.
سینهسی داغلاریم اوی!
مین یئرده آغلاریم اوی!
داغ-داش نالهدن دیندی،
یارالی قلب دؤز ایندی،
اؤلوم اجل ایشیدی،
هئییف، یاغی سئویندی.
یارالی گؤزلریم اوی!
آغلار گوندوزلریم اوی!
ناهاق قانلارا اویان،
ظلمون تانرییا ایان،
بالان آتاسیز قالسین،
منی آتاسیز قویان.
قانلی دوداقلاریم اوی!
سینان بوداقلاریم اوی!
سوراخانی، یول قانلی،
هم ساغ، هم ده سول قانلی،
دوشمن آتان گوللهدن
ایگیدیم یاریمجانلی.
چکیلمهین دردیم اوی!
قالیب یئرده مردیم اوی!
شهید قوللاریم اوسته،
آغی دئسین ائل پسته،
سنی بو حالا سالان-
اورییمدن سو ایسته.
سویوق اوتاقلاریم اوی!
قارا یاتاقلاریم اوی!
مین-مین گولله چاپاردی،
باشیمی تانک قوپاردی،
من سنی تک قویمازدیم،
قفیل گولله آپاردی.
منسیز قالان یاریم اوی!
اهده وفاداریم اوی!
یاغی کؤکسومو دیددی،
اؤلدوردو کاما یئتدی،
یارسا منیم اوستومده
اؤزونو شهید ائتدی.
دونیادا غرییم اوی!
سن منیم ملییم اوی!
بو گولله هاردان یاغیر؟
تؤکولور آغیر-آغیر.
آچ گؤزونو باخ، فلک،
پارچا-پارچادیر باغیر.
کیمدن حاق دیلییم اوی؟
دونیادا گرییم اوی!
گنجهنین یولو موشکول،
گولله آچدی قلبده گول…
ناهاققی حاق ائیلهین،
قانونون باشینا کول.
سؤنن سوبالاریم اوی!
دردلی اوبالاریم اوی!
لاچینین یولو یاغی،
گوللهدیر سولو-ساغی،
منی شوشامدان ائدن
بالان گؤرسون یورد داغی.
دردلی قاراباغیم اوی!
پوزولان نؤوراغیم اوی!
قوبانین یولو بللی،
تانکلار گلیر یوز، اللی،
قالمیسان قان ایچینده
یوخ دادا یئتن، ائللی.
قفیل فلاکتیم اوی!
اسیر مملکتیم اوی!
بئله اسمه قم یئلی،
توتوب زولوم، قان ائلی،
گوللنی یاغدیرانین
حاقدان کسیلسین علی.
باغریمی پارالار اوی!
درد منی قارالار اوی!
خانکندینه تانک چاپار،
ایچیمیزه قم یاپار،
قانیمیزی تؤکنی
ازراییل، اؤزون آپار.
قوردا یئم جانلاریم اوی!
گوناهسیز قانلاریم اوی!
دیلیم لال، اورییم قور،
قانون، هؤکوم الده زور،
گونوموزو تار ائدن
گؤرن گؤزون اولسون کور.
بوکولن دیزلریم اوی!
بوغولان سؤزلریم اوی!
گؤیچهنین باغری قاندی،
اینساف، مریفت یاندی،
ایمپئریا الیله
ایروان یئراواندی.
هانی ایگید اوردوم اوی؟
الدن گئدیر یوردوم اوی!
آغدرنی توتدولار،
ایسپیتاک اوجالتدیلار،
باغریمداکی کؤرپهیه
قفیل گولله آتدیلار.
ائوده یانانلاریم اوی!
چؤلده دونانلاریم اوی!
گؤیچه گؤلو قانلیدیر،
گؤیلری دومانلیدیر،
یاغی الده مزارلار،
نئجه آه-آمانلیدیر.
آغیر موسیبتیم اوی!
قانلی حکایهیم اوی!
اونوم حاقا اوجالسین،
دوشمن درددن قوجالسین،
منی یوردومدان ائدن-
یوردون یادلارا قالسین.
قانلی ائو-ائشیگیم اوی!
گوللهلی بئشیگیم اوی!
ناخچیوانیم داردادیر،
حاق، عدالت هاردادیر؟
هاردا کی، قان تؤکولور
اللهسیزلیق اوردادیر.
آغریلی گونلریم اوی!
باغلی دوگونلریم اوی!
یامان گون گئدر، گلمز،
مرد نامرده اییلمز،
زور ایله آلینان یورد-
اؤزونونکی دئییلمز.
الدن گئدن ائلیم اوی!
قیفیللانمیش دیلیم اوی!
گولله شیمشک تک چاخیر،
کوچهدن قانلار آخیر…
سن جان اوسته، شهیدیم،
گؤزوم گؤزونه باخیر!
گوجوم چاتمیر سنه اوی!
دوشمن داشا دؤنه اوی!
یاغی قودوزدو، یاددی،
کؤکسه مین گولله آتدی،
اجل اولسا نه دردیم؟
اؤلدورنیم جللاددی.
یوخدو بیر گوناهیم اوی!
هاردادی اللهیم اوی؟!
آغلاسین کامان، نئییم،
کسیلیب داها هئییم،
اؤز گوللمدی سینمده
بو دردی کیمه دئییم؟
تانکلارلا دؤیولدوم اوی!
یئتیش دادا اؤلدوم اوی!
سومقاییت یولوندا قان،
بدن اؤلدو، اوچدو جان،
عالیمی تانک آلتیندا
یوخ اولسون بئله دؤوران.
کاغیذیم، قلمیم اوی!
قارالان عالمیم اوی!
سومقاییتی چالدیلار،
قان تؤکوب آلچالدیلار،
یوردون عالیملرینی
تانک آلتینا سالدیلار.
شهید اولان آدیم اوی!
بوغولان فریادیم اوی!
هاوا شاختا، سویوقدو،
قلب گوللهدن اویوقدو،
اللهین گوناهی یوخ،
یوخاریدان بویروقدو.
قانلا دولو کوچم اوی!
آی ایمکانسیز گئجم اوی!
قوردا اومید ابسدی،
حاقسیزلیق حاقی کسدی!
شیرینخانیم بیر بولبول…
چیرپیندیغی قفسدی.
اؤلن حقیقتیم اوی!
دیدرگین میللتیم اوی!!!
26.01.1991-27.10.1991